Ҳурматли "Навбаҳор" жамоаси мухлислари ва "Марказий" ўйингоҳга ташриф буюриш истагида бўлган меҳмонлар Сизлардан "Марказий" ўйингоҳга кириш учун 2016 йилда сотувга чиқарилган йиллик абонемент карточкаларидан фойдаланишда учраётган айрим камчиликларни эслатиб ўтмоқчимиз.

“Марказий” ўйингоҳга ташриф буюраётган айрим ишқибозларимиз йиллик абонемент карточкаларини бошқа шахсларга беришлари оқибатида бир дона абонемент карточкасидан бир неча ишқибозларнинг “Марказий” ўйингоҳга киришлари кузатилмоқда.
"Навбаҳор” – “Металлург" ва "Навбаҳор” – “Бунёдкор" жамоалари билан “Марказий” ўйингоҳда ўтказилган ўйинларга ишқибозлар томонидан йиллик абонемент карточкаларидан ноқонуний фойдаланишга йўл қўйиш ҳолатлари аниқланди. Ноқонуний фойдаланилган йиллик абонемент карточкалари олиб қўйилди ва “Марказий” ўйингоҳ ва футбол клуби раҳбарияти томонидан бекор қилинди. Юқоридагиларга кўра Сизлардан “Марказий” ўйингоҳга севимли жамоамизнинг ўйинларини томоша қилиш учун келганда, йиллик абонемент карточкаларининг эгалари фақат ўзлари томонларидан шахсан фойдаланишлари ва “Марказий” ўйингоҳ ҳудудида ҳар бир ишқибоз фақатгина бир дона йиллик абонемент карточкасидан фойдаланиш ва ўзи билан бирга олиб юриш ҳуқуқига эгалигини яна бир карра эслатиб ўтмоқдамиз.
“Марказий” ўйингоҳга киришда ушбу тартиб ва қоидага амал қилмаган ишқибоздан йиллик абонемент карточкаси огоҳлантиришсиз олиб қўйилади ва бекор қилинади.
Ҳурматли футбол ишқибозлари Сизлардан ушбу тартиб қоидаларга сўзсиз амал қилишга, ўйингоҳда ўрнатилган ички тартиб ва интизомга, одоб ва аҳлок нормаларига риоя этишингиз сўралади. Ҳурматли ишқибозлар Сизлардан мазкур эълонни расмий огоҳлантириш сифатида қабул қилишингизни сўраймиз.
“Марказий” ўйингоҳ ва “Навбаҳор” ФК бошқаруви.