Ўзбекистонлик ёш оғир атлетикачи Фарҳод Собиров Грузиянинг Тбилиси шаҳрида йигирма ёшгача бўлган спортчилар ўртасидаги жаҳон чемпионатида битта олтин ва иккита кумуш медални қўлга киритди.
Ўзбекистон миллий олимпия қўмитасидан маълум қилинишича, 2014 йили Хитойнинг Нанкин шаҳрида ўтказилган II ўсмирлар Олимпиадаси совриндори Фарҳод Собиров жаҳон чемпионатида вазни 94 килограммгача бўлган атлетлар баҳсида иккикураш якуни бўйича 373 килограмм натижа қайд этиб, биринчи ўринни эгаллади.
Иқтидорли спортчимиз штангани даст кўтаришда 170 килограмм, силтаб кўтаришда 203 килограмм натижа билан иккита кумуш медални ҳам қўлга киритди.
Жаҳон чемпионатида Шаҳзод Худойберганов ўз вазн тоифасида кумуш, қизлар ўртасидаги баҳсларда Муаттар Набиева эса учта бронза медални қўлга киритгани ҳақида аввал хабар берган эдик.
Шу тариқа ёш атлетларимиз жаҳон чемпионатида битта олтин, учтадан кумуш ва бронза медаль билан тақдирланди.
