Аргентиналик мутахассис Марсело Бьелса «Лацио»да ишлашдан нима сабабдан бош тортганини изоҳлаб берди.

«Нима учун «Лацио» бош мураббийлигидан кетганимни тушунтириб бермоқчиман. Ёрдамчиларим ҳам худди шундай қарор қабул қилган. 

Ўтган тўрт ҳафта давомида клуби президенти Лотито томонидан келишилган режани амалга ошириш бўйича ҳеч қандай ҳаракатлар қилинмагани учун ҳам биз шундай қарор қабул қилдик. 

Мавсумолди тайёргарлиги учун 5 июлга қадар 4 та трансфер амалга оширилиши ҳақида менга ваъда беришган эди, бироқ уларнинг ҳеч бири амалга оширилмади, ваҳоланки, клуб вакилларининг ўзи ҳам жамоани кучайтириш кераклигини айтган эди. 

3 кундан сўнг мавсумолди тайёргариги бошланиши муносабати билан, менда истеъфодан бошқа чора қолмаган эди. Мен ҳар доим таъкидлаганман — менинг иш услубим футболчиларни лозим даражада шуғуллантира олишим билан боғлиқ. 

Қайд этишим жоиз, ҳозир менда бошқа жамоалардан ҳеч қандай таклиф йўқ. Яқин вақт ичида «Лацио»га, жамоани тарк этганимиз ҳақидаги ҳужжатларни тақдим этамиз», — деди Бьелса.