"Навбаҳор"ни тарк этган Александр Пишур яқинда собиқ жамоаси "Тараз" (Қозоғистон) таркибига бориб қўшилди. Украиналик журналист Пишур билан "Навбаҳор"дан кетишидан аввал, биринчи давра ўйинлари якунланишидан олдин суҳбат қурди. Мазкур суҳбатни кеч бўлса-да, эътиборингизга ҳавола этамиз.

- Қишда "Тараз"ни тарк этиб, "Навбаҳор"га ўтдингиз. Қандай қилиб Ўзбекистонга қайтиб бордингиз?
- Дўстим (Х.Каримов назарда тутиляпти) қўнғироқ қилиб янги жамоа тузилаётганини айтди . Жамоага келиб ёрдам беришимни сўради ва мен йўқ дея олмадим.

- Бошқа вариантлар ҳам бормиди? Масалан, Украинадан?
- Ҳа, бор эди. Шунчаки дўстимга сўз берганим учун Наманганга боргандим. Ўзбекистонда аввал икки йил тўп сурганман. Футболчилар орасида кўплаб яхши дўстлар орттирганман.

- Айтишларича, жамоа футболчиларни алдабди? Сизнинг режаларингиз қанчалик амалга ошди?
- Ўйлаган мақсадларимга эришолмадим, десам ҳам бўлади. Ҳозир шундай вазиятки, ҳеч ким бир-бирини кўзига қаролмайди.

- "Навбаҳор" мусобақа жадвалида 13-поғонани банд этган. Жамоа яхши ўйин кўрсата олмаяптими ёки бунга молиявий муаммолар сабабми?
- Натижалар 100% бўлмаса-да, молиявий томонга ҳам боғлиқ. Молиявий масалалар қуруқ қоғозда эмас, амалда бўлганда натижа ҳам бошқачароқ бўларди.

- Жамоани алмаштиришни режалаштиряпсизми?
- Ҳозир шу ҳақда ўйлаб турибман. Биринчи давра тугагандан сўнг бу ҳақда аниқ фикр айта оламан. Ўйлашимча, "Навбаҳор"да қолмасам керак.

- Ўзингиз кўрсатган ўйиндан қониқяпсизми? Ҳозирча 5 та гол киритдингиз.
- Тўлиқ қониққаним йўқ. Ҳеч қачон ўз манфаатимни жамоаникидан устун қўйган эмасман. Голларим бунданда кўпроқ бўлиши мумкин эди.

- Қачондан "Навбаҳор"да молиявий муаммолар бўй кўрсата бошлади?
- Уларнинг гаплари бўйича деярли муаммо йўқ. Фақат эртага нима бўлишини ҳеч ким айтолмасди.

- Жамоанинг олдингизда қанча қарзи мавжуд?
- Юмшоқ қилиб айтганда - узоқ муддатлик қарздорлик бор.

- 35 ёшни қаршиладингиз. Балки, бутсаларни михга иларсиз?
- Ҳозирча бемалол югура оламан. Фаолиятимни якунлаш ҳақида ўйлаётганим йўқ.

- Ўзбекистон ва Украина чемпионатлари ўртасида фарқ борми?
- Фарқ кўрмаяпман. Ҳозир ҳамма футбол ўйнашни ўрганиб олган. Украина чемпионатида анчадан бери ўйнаганим йўқ. Бир нарсани алоҳида айтишим мумкинки, Украина чемпионатининг савияси кўтарилмаяпти.

- Ўзбекистонликлар билан тил топишда қийналмадингизми?
- Бу ҳақда муаммо кўрмаяпман, деярли барча рус тилида гаплаша олади.

- Легионер футболчиларга муносабат қандай?
- Ёмон эмас. Масалан мени жамоада илиқ кутиб олишди.