Хабарингиз бор, шу йилнинг 15-17 июль кунлари пойтахтимиздаги олимпия захиралари Республика теннис мактабида Ўзбекистон ҳамда Хитой терма жамоалари ўртасида Дэвис кубогининг Осиё ва Океания минтақаси биринчи гуруҳидан ўрин эгаллаган учрашув ўтказилади. Мазкур учрашув ғолиби жаҳон лигаси йўлланмаси учун ўтказиладиган плей-офф босқичида қатнашиш хуқуқига эга бўлади.    Дэвис кубоги баҳсларида бу икки терма жамоа шу кунга қадар саккиз бор тўқнаш келганлар. Беш учрашувда ҳамюртларимизнинг қўллари баланд келган бўлса, қолган уч ўйинда хитойликлар зафар қучишган.    Ўзбекистон – Хитой терма жамоаларининг ўзаро биринчи учрашуви 1995 йили бўлиб ўтган эди. Осиё ва Океания минтақасининг иккинчи гуруҳидан биринчи гуруҳга ўтиш учун ўтказилган ушбу ўйинда чин мамлакати вакиллари 3:2 ҳисобида ғалаба қозонишган эди. Сўнгги бор ушбу жамоалар 2014 йили Хитойда рўбаро келишган. Жаҳон лигаси йўлланмаси учун кечган саралаш мазкур учрашуви ҳам ўта муросасиз рухда ўтиб, унда ҳамюрларимиз 3:2 ҳисобида зафар қучганлар.    Ўтган икки йил ичида ҳар икки терма жамоа таркибида ҳам сезиларли ўзгаришлар кузатилмади. Хитой квартетининг етакчиси 25 ёшли Ди У бугунги кунда дунё рейтинг жадвалида 175-ўринда бормоқда. Хитой терма жамоасидан, шунингдек, Цзе Жанг, МаоКсин Гонг ва Чже Ли ўрин эгаллашган..     Ўзбекистон терма жамоаси таркибига эса Денис Истомин (дунё рейтингида 97-ўрин), Фаррух Дўстов (225-ўрин), Санжар Файзиев ва Жўрабек Каримов киритилган.    Бугун олимпия захиралари Республика теннис мактабида ушбу учрашув олдидан матбуот анжумани ўтказилади. Матбуот анжумани соат 12:00да бошланади. Учрашувга қуръа ташлаш маросими ҳамда кейинги матбуот анжумани 14 июль куни “LOTTE CITY HOTEL TASHKENT PALACE” меҳмонхонасида ўтказилади.Мазкур тадбир соат 10:00да бошланади.