Термизда шахмат ва шашка бўйича “Биз ақл-идрокли оилалармиз” спорт мусобақасининг ҳудудий финал босқичи бўлиб ўтди.

Ватанимиз мустақиллигининг 25 йиллигига бағишлаб ўтказилган турнирда Президентимиз раҳнамолигида болалар спортини ривожлантириш, соғлом турмуш тарзини тарғиб этиш, хотин-қизлар ва ёшлар ўртасида спортнинг оммавийлигини оширишга алоҳида эътибор қаратилаётгани таъкидланди. Мазкур мусобақа ҳам худди шу мақсадга хизмат қилиши билан аҳамиятлидир.

“Маҳалла” хайрия жамоат фонди вилоят бўлими ва бошқа ташкилотлар ҳамкорлигида ташкил этилган мусобақада 84 оила ўзаро баҳслашди.

Бойсун тумани Пасурхи маҳалласидан Нусрат Жабборов оиласи фахрли биринчи ўринни қўлга киритди. Ангор тумани Кайран маҳалласидан Йўлдош Жонқулов оиласига иккинчи ўрин насиб этди. Термиз шаҳри Бўстон маҳалласидан Панжи Янгибоев оиласи ва Узун тумани Баҳористон маҳалласидан Шамсиддин Ашуров оиласи учинчи ўринни эгаллади.

Ғолиблар ташкилотчиларнинг эсдалик совғалари билан тақдирланди.