Тошкент вилояти Қибрай туманида шахмат ва шашка бўйича “Биз ақл-идрокли оилалармиз” спорт мусобақасининг ҳудудий финал босқичи бўлиб ўтди.

Ватанимиз мустақиллигининг 25 йиллигига бағишлаб “Маҳалла” хайрия жамоат фонди вилоят бўлими ва бошқа ташкилотлар ҳамкорлигида ташкил этилган тадбирда Президентимиз раҳнамолигида ёшларнинг жисмонан соғлом, маънан етук инсонлар бўлиб улғайиши, спорт билан мунтазам шуғулланиши, ўз истеъдод ва салоҳиятини намоён этиши учун замонавий шароитлар яратилаётгани таъкидланди.

Мусобақада юзга яқин оила вакиллари ўз истеъдодини синовдан ўтказди.

– Бугунги беллашувларда оиламизнинг биринчи ўринни қўлга киритиши осон бўлмади, – дейди оққўрғонлик иштирокчи Қайнар ота Бобоев. – Баҳслар давомида бир-биримизни қўллаб-қувватлаганимиз ғалабамизни таъминлади. Ушбу турнир сабаб шахматга қизиқиши юқори бўлган набираларимнинг ўзига ишончи янада ортди. Шахматга қизиқувчи кўплаб дўстлар билан танишди.

Мусобақа якунида энг яхши натижа қайд этган оила вакиллари ва фаол иштирокчиларга диплом ҳамда эсдалик совғалари топширилди.