Нукусда ўтказилган шахмат ва шашка бўйича “Биз ақл-идрокли оилалармиз” спорт мусобақасининг Қорақалпоғистон Республикаси босқичида Хўжайли туманидан Абдикарим Тўраевлар оиласи ғолибликни қўлга киритди.

Президентимиз раҳнамолигида спорт, хусусан, оилавий спортни ривожлантириш, оилаларда соғлом турмуш тарзини қарор топтириш, ёшларнинг бўш вақтини мазмунли ўтказишга қаратилган мусобақада бува ва буви, ота-она ва 2 нафар набирадан иборат таркибдаги оилавий жамоалар ўз маҳоратини намойиш этди.

“Маҳалла” хайрия жамоат фонди Қорақалпоғистон Республикаси бўлими ва бошқа ташкилотлар ҳамкорлигида ташкил этилган мусобақанинг қуйи босқичларида 5 минг 100 дан ортиқ оила иштирок этди. Улар орасидан сараланган энг кучли 15 оила мусобақанинг Қорақалпоғистон Республикаси босқичида куч синашди.

Чимбой тумани Қоракўл маҳалласидан Кенгесбой Рейимовлар оиласи иккинчи ўринни эгаллади. Учинчи ўрин Қўнғирот тумани Тарақли маҳалласидан Ўринбой Есенқулов ҳамда Тахтакўпир тумани “Отакўл” овул фуқаролар йиғинидан Ўтемурат Мавленовлар оиласига насиб этди.