Нукусда “Отам, онам ва мен – спортчи оила” мусобақаси бўлиб ўтди.

“Соғлом она ва бола йили” Давлат дастури ижроси доирасида ташкил этилган тадбирда Президентимиз раҳнамолигида спорт, айниқса болалар спортини ривожлантириш, аҳоли ўртасида соғлом турмуш тарзини тарғиб этишга алоҳида эътибор қаратилаётгани таъкидланди. Мазкур спорт мусобақаси ҳам худди шу мақсадга қаратилгани билан аҳамиятлидир.

– Маҳаллаларда жисмоний тарбия ва спорт билан шуғулланувчи оилалар сони йилдан-йилга кўпаймоқда, – дейди “Маҳалла” хайрия жамоат фонди Қорақалпоғистон Республикаси бўлими бошлиғи Хўжабой Елмуратов. – Мазкур спорт ўйинларининг саралаш босқичида қарийб 2 минг 900 жамоа баҳслашди.

Энг кучли, чаққон ва эпчил 15 оилавий жамоа мусобақанинг Қорақалпоғистон Республикаси босқичида ўз маҳоратини намойиш этди. Тўсиқлар оша эстафета, чаққонлик ва мерганлик, арқон тортиш, шахмат-шашка ва бошқа ўйинларда энг юқори натижа кўрсатган Нукус туманидаги Оқ терак маҳалласида яшовчи Сержановлар оилавий жамоаси биринчи ўринни эгаллаб, бош совринни қўлга киритди.