Навоийда ўтказилган “Отам, онам ва мен – спортчи оила” мусобақасида 10 оила иштирок этди.

“Маҳалла” хайрия жамоат фонди вилоят бўлими, вилоят маданият ва спорт ишлари бошқармаси ва бошқа ташкилотлар ҳамкорлигида ташкил этилган тадбирда Президентимиз раҳнамолигида аҳоли, айниқса, ёшлар ва хотин-қизлар ўртасида спортни янада оммалаштириш, соғлом турмуш тарзини қарор топтириш, оилаларда жисмоний маданиятни юксалтиришга алоҳида эътибор қаратилаётгани таъкидланди.

Мусобақа шартлари бўйича эпчиллик ва моҳирлигини намойиш этган Қизилтепа туманидан Раҳмоновлар оиласи биринчи ўринни қўлга киритди. Иккинчи ва учинчи ўринларга Кармана туманидан Жумаевлар ҳамда Зарафшон шаҳридан Полвоновлар оиласи сазовор бўлди.

– Бизнинг оилада бирор спорт тури билан шуғулланиш яхши анъанага айланган, – дейди мусобақа ғолиби Шомурод Раҳмонов. – Туманимиздаги 35-умумтаълим мактабида жисмоний тарбиядан дарс бераман. 4 фарзандим ва турмуш ўртоғим спортнинг волейбол, бадиий гимнастика, футбол турлари билан мунтазам шуғулланади. Мусобақанинг мамлакат босқичида ҳам юқори ўринлар учун курашамиз.

Иштирокчилар “Энг аҳил жамоа”, “Энг ёш жамоа”, “Жамоанинг ғалабага бўлган ишончи”, “Энг тезкор жамоа”, “Энг эпчил жамоа”, “Энг фаол жамоа”, “Энг ибратли жамоа” номинациялари бўйича ҳам тақдирланди.