Иккинчи давра олдидан "Локомотив" билан шартнома имзолаган Артур Геворкян янги клуби ва мақсадлари ҳақида ўз фикрини билдирди. Маълумки, туркманистонлик ярим ҳимоячи "темирйўлчилар" билан Минск йиғинида иштирок этди ва ҳозирда жамоага анча кўникиб олди.

- "Локомотив" таркибига келиб қўшилганимдан жуда хурсандман, - дейди "Қирол Артур" лақаби билан танилган моҳир футболчи. - Бу ўз олдига юксак мақсадларни қўяётган клуб ҳисобланади. Менинг бу жамоага ўтишим қийин кечмади. Музокаралар жуда тез олиб борилди. Ўйлайманки, "Насаф" учун боримни бера олдим ва муҳитни ўзгартириш пайти келганди. Ўз навбатида қаршилик мухлисларга раҳмат айтиб қоламан.

 - "Локомотив" - кучли клуб, бу ерда мени жуда илиқ кутиб олишди. Кўп футболчиларни яқиндан танийман. Минск йиғини яхши кечди, у ерда иккита ўртоқлик ўйини ўтказдик. "Локомотив" ҳам Осиё чемпионлар лигаси, ҳам Ўзбекистон чемпионати ва Кубогида муваффақиятли давом этмоқда ва иккинчи даврада ўз ўйиним жамоага ёрдам беришни хоҳлайман. Янги жамоам ўзи иштирок этаётган барча мусобақаларда ғолиб чиқиши учун бор кучим билан ҳаракат қиламан.