Рио-де-Жанейро олимпиадасида 64 кило вазндаги боксчилар дастлабки саралаш баҳсларига киришишди. Ўзбекистонлик боксчи Фазлиддин Ғоибназаров ортиқча муаммосиз нимчорак финалга йўл олди.
Ҳамюртимиз бугун конголик Дивал Малонгога қарши рингга кўтарилди. Африкалик боксчи асосан ринг бўйлаб қочиб юрди десак муболаға бўлмайди. Ҳамюртимиз раунддан раундга ўз устунлигини ошириб борди. Рефери уч марта нокдаунни қайд этиб, ҳисобни очди. Жанг тугашига бир неча сония қолганида учинчи нокдаундан кейин баҳс якунланди. Техник нокаут.
Фазлиддин баҳсни тўла назорат қилди, ўзига ишонган ҳолда жанг олиб борди. Бу беллашув ватандошимиз учун машғулот вазифасини ўтади, десак ҳам бўлади.
Бугун Ғоибназаров хонадонида қизалоқ дунёга келган экан. Фарзанд ва ғалаба билан боксчимизни табриклаймиз. Кейинги босқичларда ҳам унга ғалабалар тилаб қоламиз.
