Бразилиянинг Рио-де-Жанейро шаҳрида давом этаётган XXXI ёзги Олимпия ўйинларида мамлакатимиз боксчилари ҳам муваффақиятли иштирок этмоқда.

Вазни 49 килограммгача бўлган чарм қўлқоп усталари ўртасида рингга чиққан Ҳасанбой Дўстматов ярим финал йўлланмаси учун кечган баҳсда қозоғистонлик Биржан Жакипов устидан ишончли ғалаба қозонди. Энди боксчимиз ярим финалда АҚШ вакили Мигель Нико Хернандез билан куч синашади.

Вазни 91 килограммгача бўлган боксчилар ўртасида Рустам Тўлаганов ҳам чорак финалда озарбайжонлик Абдулқодир Абдуллаевни мағлубиятга учратиб, медаллар учун курашни давом эттирадиган бўлди. Ярим финалда у россиялик Евгений Тишенкога қарши рингга чиқади.

Вазни 60 килограммгача бўлган боксчилар баҳсида қатнашаётган Хуршид Тожибоев Буюк Британия вакили Жосеф Кординага ҳеч қандай имконият қолдирмади ва чорак финалга чиқди. Энди у ярим финал йўлланмаси учун Бразилия вакили Робсон Консеисао билан куч синашади.

64 килограммгача бўлган вазн тоифасидаги спортчилар ўртасида илк жангини ўтказган Фазлиддин Ғоибназаров конголик Дивал Малонгани техник нокаутга учратди. Фазлиддиннинг навбатдаги рақиби ҳиндистонлик Манож Кумар бўлди.

XXXI ёзги Олимпия ўйинларининг 11 август кунги мусобақаларида дзюдочимиз Сойиб Қурбонов, боксчиларимиз Шаҳрам Ғиёсов ва Элшод Расулов ўз вазн тоифасидаги беллашувларда маҳоратини синовдан ўтказади.