Иккинчи даврани муваффақиятли бошлаган Навоийнинг “Қизилқум” жамоаси 18-тур доирасида Тошкент вилоятининг “Олмалиқ” футболчилари меҳмон бўлади. Навоийликларнинг охирги турлардаги ғалабасида мухлисларнинг ҳам катта ҳиссаси бор, албатта. 

Жорий йилги мавсумда совринли ўринларга кўз тиккан “Қизилқум” жамоасини Тошкент вилоятида ҳам Мухлислар клуби аъзолари қўллаб-қувватлаб туришади.

— Иккинчи даврада сезиларли даражада кучайган жамоамизнинг учрашувларини кузатиш биз мухлисларга завқ беради. Эътироф этиш керакки, клубимиз мухлислари сони нафақат Навоийда, балки мамлакатимизнинг бошқа вилоятларида ҳам ортиб бормоқда. Мухлислар клуби ҳам аслида бир жамоа! Майдонда “Қизилқум”нинг 12-ўйинчиси вазифасини ўташга доимо тайёрмиз! Бундан фахрланган ҳолда мавсум охирига қадар деярли барча учрашувларда бевосита стадиондан туриб “Қизилқум”ни қўллаб-қувватлашга доимо шаймиз! Зеро, барча мухлис учун жамоасининг учрашувларини стадиондан туриб томоша қилиш бахт ҳисобланади, — дейди “Қизилқум” ПФК Мухлислар клуби етакчиси Шаҳриддин Ишназаров.

Эслатиб ўтамиз, навоийлик мухлисларнинг Олмалиқ шаҳрига бориш-келиши учун “Қизилқум” футбол клуби махсус автобус ажратган. Автобус 13 август куни эрталаб соат 6.30 да Навоий шаҳридаги “Сўғдиёна” стадиони олдидан жўнайди.

Мурожаат учун телефон: +998913333773. Шаҳриддин Ишназаров.

Демак, “Қизилқум” жамоаси мухлисларини Олмалиқдаги ОТМК спорт мажмуасига таклиф этамиз. “Олмалиқ” — “Қизилқум” учрашуви 13 август куни соат 19.15 да бошланади.