Тошкент вақти билан соат 03:00да 105 кг. гача бўлган вазнда оғир атлетика мусобақаси бошланади. "А" гуруҳида 9 нафар спортчи медаллар учун курашни бошлашади.

Ушбу баҳсда ўзбекистонлик икки спортчи — Иван Ефремов ва Руслан Нуриддинов иштирок этишади.

Атлетлар берган дастлабки буюртмаларга аҳамият қаратадиган бўлсак, ҳар иккала йўналишда энг оғир буюртмани ҳамюртимиз Руслан Нуриддинов берганига гувоҳ бўламиз. У ўз иштирокини даст кўтаришда 190 кг., силтаб кўтаришда эса 225 кг. оғирликдаги штангани кўтаришга қарор қилган. Албатта, бу мусобақанинг боришига қараб ўзгариши мумкин.

Иван Ефремов эса даст кўтаришнинг илк уриниши учун 185 кг, силтаб кўтаришда 210 кг. оғирликка буюртма берган.

Атлетлар ҳар бир йўналишда 3 мартадан уринишни амалга оширишади. Даст ва силтаб кўтариш йўналишларидаги натижалар умумлаштирилиб, ғолиб ва совриндорлар номи аниқ бўлади.

Спортчилар кўтарган оғирлик тенг бўлиб қолганида шахсий вазн борасида енгилроқ бўлган атлетга устунлик тақдим этилади.

Спортчи  — даст кўтаришдаги буюртмаси  — силтаб кўтаришдаги буюртмаси

Артурс Плесниекс (Латвия, 103,99 кг)  — 173 кг. — 215 кг.
Аркадиуш Михальский (Польша, 104,77)  — 175 — 220
Бартломей Бонк (Польша, 104,07)  — 180 — 215
Муҳаммадризо Барорий (Эрон, 104.65)  — 180 — 220
Иван Ефремов (Ўзбекистон, 104,90) — 185 — 210
Симон Мартиросян (Арманистон, 104, 63) — 185 — 220
Янг Чжэ (Хитой, 104,59)  — 185 — 220
Александр Зайчиков (Қозоғистон, 104,51)  — 185 — 223
Руслан Нуриддинов (Ўзбекистон, 104,96)  — 190 — 225 кг.