Чемпионлар лигасидан ўрин олган «Стяуа» - «Манчестер Сити» ўйинида қизиқ воқеа юз берди. Бухарестнинг «Динамо» клуби мухлислари «Стяуа» ишқибозларини қойилмақом тарзда чув туширишди.
«Динамо» мухлислари ўйиндан олдин, стадионга кўнгиллилар сафида хуфёна ишга кириб олишди. Шундан сўнг улар мухлислар ўтирадиган ўриндиқларга махсус қоғозларни шундай тартибда қўйиб чиқишдики, уларни кўтарганда «Динамо» клубининг бош шиори порлаб турадиган бўлди.
Ўйин бошланишидан олдин, бундан бехабар «Стяуа» мухлислари қоғозларни кўтарганда, трибуна узра «Фақат «Динамо» Бухарест» деган ёзув пайдо бўлди.
Эслатиб ўтамиз, «Динамо» ва «Стяуа» мухлислари бир-бири билан азалдан ашаддий душман ҳисобланади. Икки клуб ўртасида ўтган ўйинлар кўпинча жанжал ва можаролар билан тугайди.
