Рио-2016 олимпиадасида иштирок этувчи АҚШ спортчилари совриндор бўлган тақдирда оладиган мукофот пуллари билан мақтана олмайди. Олтин, кумуш ва бронза медалларни қўлга киритган олимпиячилар мос равишда 25 минг, 15 минг ва 10 минг АҚШ доллари миқдорида мукофот олишади холос.

Бироқ бу пулларнинг барчаси уларни чўнтагига тушмайди. АҚШ олимпия қўмитасидан олинган мукофот пуллари АҚШда даромад ҳисобланади ва улардан 40% солиқ тўланиши шарт. Бундан ташқари олимпиада медалининг қиймати ҳам даромадга киради. Умумий ҳисобда оладиган бўлсак, олимпиада чемпиони 10 минг доллар солиқ тўлайди.

Тасаввур қилинг, олимпиадада мамлакат шарафини муносиб ҳимоя қилган ва чемпион бўлган спортчи уйига келиши биланоқ, солиқ қўмитасидан (IRS) қуйидаги мазмунда хат олади.

«Олимпиада совриндори бўлганингиз билан чин кўнгилдан табриклаймиз. Сиз миллат қаҳрамонисиз, сиз билан фахрланамиз. Спортдаги кейинги фаолиятингизга муваффақият тилаймиз, сизни доимо кузатиб борамиз. Илтимос, қўлга киритган олтин медалингиз учун оладиган мукофот пулидан 10 минг доллар солиқ тўлашни унутманг. Солиқ тўлашнинг сўнгги муддати қуйидагича... Ҳурмат билан IRS»»