АҚШ Миллий олимпия қўмитаси (USOC) терма жамоа сузувчиларининг хулқи учун Рио–2016 ташкилий қўмитасидан узр сўради. Бу ҳақда USOC матбуот хизмати маълум қилди, деб хабар бермоқда «ТАСС».
АҚШ Миллий олимпия қўмитаси ижрочи директори Скотт Блэкманнинг фикрича, сузувчиларнинг бундай хатти-ҳаракати номақбулдир ва терма жамоанинг бошқа аъзолари хулқини ифодаламайди. Шунингдек, Блэкман сузувчиларни жазолаш масаласини кўриб чиқишга ваъда берди.
«АҚШ олимпия терма жамоаси номидан Риодаги Олимпиада ташкилотчилари ва Бразилия халқига бўлиб ўтган тушунмовчилик учун узримизни келтирамиз», – деди Скотт Блэкман.
Бир неча кун аввал АҚШ Миллий олимпия қўмитаси терма жамоанинг тўрт нафар аъзоси Рио-де-Жанейро шаҳрида тунаб кетилгани ҳақида маълум қилганди. Тарқалган хабарларга кўра, Гуннар Бенц, Жек Конгер, Жеймс Фейген ва Райан Лохте 14 августга ўтар кечаси кечки базмдан олимпия шаҳарчасига қайтаётган бўлган. Улар ўтирган таксига ўзини полиция ходими деб таништирган қуролланган шахслар томонидан ҳужум қилинди. Жиноятчилар гўёки спортчилардан пул ва бошқа шахсий буюмларни талаб қилган.
Бироқ ҳуқуқ-тартибот ходимлари жабрланганларнинг аризаси ростлигига шубҳа қилди. 18 август, пайшанба куни спортчилар тунаб кетилмагани аниқланди. Улар ёқилғи қуйиш шохобчасида зарар етказилган мулкка пул тўлагани маълум бўлди.
