АҚШда афсонавий боксчи Муҳаммад Алига тегишли 79 буюм савдога қўйилади. Бу ҳақда уларни ўтказадиган Heritage Auctions аукцион уйи вакилларига таяниб, Reuters маълум қилди, дея хабар беради «РБК».
Бошқа лотлар қаторидан Али 1974 йили Жорж Форман устидан ғалаба қозонгандан сўнг қўлга киритган Бутундунё бокс кенгашининг (WBC) оғир вазндаги мутлақ чемпиони камари ҳам ўрин олган. Унинг бошланғич баҳоси 600 минг доллардан иборат.
Шунингдек, аукционга боксчининг 1964 йилда Life журналига йўллаган ва у исломни қабул қилиши ҳамда исмини ўзгартиришига ундаган сабабларни баён қилган мактуб ҳам сотувга қўйилган. Уни камида 100 минг долларга сотиш мўлжалланмоқда.
Аукцион 10 сентябрда ўтказилади. Кимошдига қўйиладиган барча лотлар хусусий коллекцияларда эканлиги, улар орасида Алининг оиласига тегишли буюмлар йўқлиги билдирилмоқда.
