Бокснинг яна бир вазн тоифасида олтин медаль ўзбекистонлик спортчига насиб қилди. 52 кг. вазндаги боксчимиз Шаҳобиддин Зоиров финалда россиялик Миша Алоянни мағлубиятга учратди.

Ўзбек боксчиси жангни тўғри тактика асосида жуда яхши бошлади. Шаҳобиддин рақибга аниқ зарбалар бериб, мустаҳкам ҳимояланаётган эди. Аммо биринчи бўлим ўрталарида ҳамюртимиз рақибнинг 3-4та аниқ зарбасини ўтказиб юборди. Шунга қарамай, ҳамюртимиз ўзига келиб олди ва раунд сўнгида йўқотилган очколарни тиклашга ҳаракат қилди. Биринчи бўлим учун ҳакамларнинг икки нафари устунликни Алоянга, бир нафари Зоировга берди. 10:9, 9:10, 9:10.

Иккинчи раунд ўзбекистонлик спортчининг тўла устунлиги остида кечди. Шаҳобиддиннинг кетма-кет аниқ зарбалари Мишани деярли мувозанатдан чиқарди. Ҳакамларнинг барчаси иккинчи бўлим учун устунликни боксчимизга беришди. Натижада сўнгги бўлим олдидан ҳисоб 20:18, 19:19, 19:19 кўринишга келди.

Сўнгги бўлимда боксчилар ҳолдан тойишганди. Лекин ҳар иккаласи "олтин"ни исташи тайин эди. Шу боис спортчилар бор кучларини бериб ҳаракат қилишди. Аниқлик борасида эса Зоиров бироз устунликка эришди.

Ғалаба! Чемпионлик! Олтин медаль бизники! 3:0 — 30:27, 29:28, 29:28!