Ўзбекистон миллий терма жамоасининг Жаҳон чемпионати саралашининг учинчи босқичи доирасидаги рақибларидан бири – Эрон Италияда иккита ўртоқлик учрашуви ўтказди.
Кейруш бошчилигидаги жамоа Италияда ўтказилган 12 кунлик ўқув-машғулот йиғини давомида иккита ўртоқлик учрашувида майдонга тушди.
Дастлаб, 19 август куни В серияси вакили “Спал” жамоасига қарши майдонга тушган форслар Ансорий, Камябиния ҳамда Баҳдор киритган голлар эвазига 3:0 ҳисобида ғолиб келди.
23 августда эса Эрон Италия B серияси ёшларидан тузилган терма жамоага қарши ўйнаб, йирик – 4:0 ҳисобида ғалаба қозонди. Бу учрашувда Жаҳонбахш дубл қайд этган бўлса, Азмун ҳамда Тареми ўз ҳисобларига биттадан гол ёзиб қўйиб, Эроннинг ғалабасини таъминлади.
Айни вақтда ФИФА рейтингида Осиё қитъаси мамлакатлари орасида биринчи ўринни эгаллаб турган Эрон Жаҳон чемпионати саралашининг учинчи босқичи доирасида 6 октябрь куни Тошкентда Ўзбекистон миллий терма жамоасига қарши майдонга тушади. Ушбу босқичдаги биринчи ўйинини португалиялик мутахассис шогирдлари 1 сентябрда Қатарга қарши ўз уйларида ўтказишади.
