Мамлакат миллий чемпионатининг 20-турини пойтахтда – “Обод”га қарши ўтказган жамоамиз дуранг ўйнади ва муҳим икки очкони йўқотди – 1:1. Ўйиндан кейин иккала жамоа мураббийлари иштирокида матбуот анжумани ўтказилди. Даставвал журналистларнинг саволларига “Металлург” жамоаси бошлиғи Ш.Саидов жавоб қайтарди.   Шавкат Саидов, “Металлург” ФК бош мураббийи:- “Обод” билан учрашув осон кечмаслигини билардик. Чунки “Обод” олий лигадаги ўрнини сақлаб қолишга интилаяпти ва ҳар битта ўйинда ғалаба учун майдонга тушмоқда. Бугунги натижадан қониқмадик, аммо биз учун битта хурсандчилик келтирадиган янгилик бўлди. Ниҳоят бизнинг фойдамизга мавсумдаги биринчи пенальти белгиланди. Бевосита ўйинга тўхталадиган бўлсам, биринчи бўлимда бизда иккита, мезбонларда битта голлик имкониятлар бўлди. Аммо иккала жамоа ҳам вазиятдан фойдаланишда оқсади. Иккинчи бўлимда эса ташаббусни мезбонларга бериб қўйдик. Мураббийларимиз билан кейинги учрашувга қадар бу ўйинни чуқур таҳлил қиламиз. Йўл қўйилган хатоларни бошқа такрорламаслик устида ишлаймиз,дейди Шавкат Саидов.