Чемпионатимизда юзага келган қисқа танаффус пайтида ҳам Олий лига жамоалари машғулотларни давом эттиришмоқда.

Кеча "Навбаҳор" ўз қароргоҳида машғулот олиб борди. Олдинда жамоани 9 сентябрь куни "Олмалиқ"қа қарши учрашув кутиб турибди. Равшан Бозоров шогирдлари эртага машғулотларни якунлашади. Мустақиллик байрамидан сўнг, яъни 3 сентябрьдан тайёргарлик давом эттирилади. Ҳозирча "лочинлар" таркибида йўқотишлар йўқ.

Кечаги машғулотдан сўнг "Навбаҳор" ярим ҳимоячиси Аъзам Алиевнинг фикрлари билан қизиқдик: - "Шўртан"дан учралган мағлубиятда ўзимизни оқламоқчи эмасмиз. Сўнгги дақиқаларда устунликни мезбонларга бериб қўйдик. Тўғри, мухлисларимиз жамоадан қаттиқ ранжишган. Биз ишқибозларимиз олдидаги айбимизни ювамиз, албатта. "Олмалиқ" кучли рақиб. Аслида Олий лигада барча жамоага қарши ўйнаш қийин. Шундай бўлсада, "Олмалиқ"ни енгиб, мухлисларимизни хурсанд қилмоқчимиз, - дейди Алиев.