Хабар қилганимиздек, кеча "Машъал" жамоамиз сафрда Олмалиқ шахрида "Олмалиқ" жамоаси билан ўзаро назорат баҳсида майдонга тушди.
Ўйин бошиданоқ ҳужумда фаол ҳаракат қилган майдон эгалари 1-бўлимнинг 5-дақиқасида ҳисобни очишга эришдилар, бу вазиятда "Олмалиқ" вакили Азиз Суюнов Ботир Носиров қўриқлаётган дарвозани осонгина ишғол қилди. Орадан олти дақиқа ўтиб Мубораклик футболчилар мувозанатни тикладилар ушбу вазиятда "Олмалиқ" футболчилари Хумоюн Муртазоевни қўриқлашни унитишганди, Муртазоев эса совуққонлик билан рақиб дарвозабонини доғда қолдирди 1:1. Шундан сўнг ҳар икки жамоа яна ҳужумга зўр беришди. Жамоамизнинг ўртоқлик ўйинларида ҳозрча омади чопаётган ҳужумчиси Зоҳир Қўзибоев уйиннинг 62 дақиқасида Ортиқов қўриқлаётган дарвозани нишонга олишда хато қилмади ва жамоамиз бу сафар ҳисобда олдинга чиқиб олди 1:2. Ўз таркибига бир қатор ёш футболчиларни майдонга тушурган "Газачилар" ўйиннинг қолган қисмида ҳам фаол ҳаракат қилишди. Аммо ҳимоячилар хатосидан унумли фойдаланган "Олмалиқ" нинг ёш футболчиси Темур Усмонов 90 дақиқада ҳисоб 2:2 бўлишини таъминлади. Шу тариқа "Машъал" жамоамиз иккинчи назорат баҳсида дуранг натижани қайд этди.
