Ўзбекистон миллий терма жамоаси "Бунёдкор" стадионида Сурияга қарши ўйиндан олдинги расмий машғулотини ўтказди.
Самвел Бабаян бош мураббийлигидаги Ўзбекистон миллий терма жамоаси 1 сентябрь куни Сурияга қарши бўлиб ўтадиган ўйин олдидан расмий машғулот ўтказди. Таъкидлаш жоиз, бугунги машғулотларда терма жамоага жалб этилган футболчиларнинг барчаси иштирок этган. Миллий терма жамоа сардори, "Краснодар" аъзоси Одил Аҳмедов ҳамда Москванинг "Локомотив" клуби аъзоси Виталий Денисов терма жамоа ихтиёрига етиб келишган. Шунингдек, Сардор Рашидов ҳамда бошқа легионерлар ҳам тўлиқ таркибда миллий терма жамоа машғулотларида иштирок этишмоқда.
Эслатиб ўтамиз, бугун ҳар иккала терма жамоа бош мураббийлари иштирокида ўйинолди матбуот анжумани бўлиб ўтди. Матбуот анжуманида ОАВ вакиллари саволларига жавоб берган Самвел Бабаян футболчилар мустақиллик байрамига ғалаба совға қилиш мақсадида эканини таъкидлади.
Ўзбекистон ҳамда Сурия терма жамоалари ўртасидаги учрашув 1 сентябрь куни "Бунёдкор" стадионида бўлиб ўтади. Учрашув соат 20:00да бошланади.
Ўзбекистон миллий терма жамоасининг расмий машғулотидан фотосуратларни галерея бўлимида томоша қилиш мумкин
