Ўзбекистон миллий терма жамоасининг ЖЧ-2018 3-саралаш босқичи илк туридаги рақиби – Сурия терма жамоаси ўйин бўлиб ўтадиган "Бунёдкор" стадионида расмий машғулотини ўтказди.
Бир қатор маҳаллий ҳамда хорижлик ОАВ вакиллари машғулотларнинг дастлабки 15 дақиқасини стадионда кузатишга муваффақ бўлдилар. Тошкентга 24 нафар футболчи билан ташриф буюрган Сурия терма жамоаси бунгача, 27 август куни сафарда Тожикистон терма жамоасига қарши ўртоқлик учрашувида майдонга тушган ва бу ўйин Ўзбекистонга қарши ўйинга тайёргарлик вазифасини бажарган эди.
Бугун бўлиб ўтган матбуот анжуманида, Сурия терма жамоаси бош мураббийи Айман Ҳаким Ўзбекистонга қарши ўйин унинг шогирдлари учун катта синов эканлигини таъкидлади. Эслатиб ўтамиз, Ўзбекистон ҳамда Сурия терма жамоалари ўртасидаги ўйин 1 сентябрь куни Тошкентдаги "Бунёдкор" стадионида бўлиб ўтади. Ўйин 20:00да бошланади.
Сурия терма жамоасининг ўйинолди расмий машғулотларидан фотосуратларни сайтнинг галерея бўлимида томоша қилиш мумкин.
