Рио-де-Жанейро паралимпия ўйинларида спортчиларимиз медалларни қўлга киритишда давом этишмоқда.

Эркаклар баттерфляй услубида (S13) 100 метрга сузиш мусобақасида бирданига икки нафар спортчимиз шоҳсупага кўтариладиган бўлди. Кирилл Паньков ва Музаффар Турсунхўжаев бугун эрталаб ўтказилган саралаш баҳсларидан муваффақиятли ўтиб, финал йўлланмасини қўлга киритишганди. Финалда эса Паньков финишга 2-ўринда етиб келган бўлса, Турсунхўжаев бронза медалига эга бўлди.

Аёллар ўртасидаги баттерфляй услубида (S13) 100 метрга сузиш мусобақаси ҳам қизиқарли кечди. Бирданига 3 нафар спортчимиз саралашдан муваффақиятли ўтиб, финалда иштирок этиш ҳуқуқини қўлга киритганди. Дастлабки 50 метр масофада Муслима Одилова 1-ўринда бораётганди, бироқ финишга АҚШлик сузувчи биринчи бўлиб етиб келди. Одилова кумуш медалга сазовор бўлган бўлса, Фотимахон Омилова бронза медалини қўлга киритди. Шохсанамхон Тошпўлатова эса 4-ўринни банд этди.

Шу тариқа, ўзбекистонлик спортчилар паралимпия ўйинларининг илк кунида нақ 8 медални қўлга киритишди. Улардан 3таси олтин, 2таси кумуш ва яна 3таси бронза. Ушбу натижа билан Ўзбекистон делегацияси медаллар ҳисоби бўйича 3-ўринда бормоқда. Бештадан олтин медалларни жамғарган Хитой ва Буюк Британия 1 ва 2-ўринларни эгаллаб туришибди.