10 сентябрь куни старт оладиган футзал бўйича Жаҳон Чемпионати иштирокчилари — Ўзбекистон ва Италия терма жамоалари Колумбияда машғулот ўйинида майдонга тушди.

Аввалроқ Италияга қарши учрашув ўртоқлик мақомида ўтиши хабар қилинганди. Бироқ мундиалга саноқли кунлар қолганини инобатга олган ФИФА ўртоқлик учрашуви учун рухсат бермади. Регламентга кўра барча ўйинлар 5 сентябрга қадар ўтиши кераклиги айтилган.

Шундан келиб чиқиб, Италия ва Ўзбекистон томони ўзаро келишган холда машғулот ўйини ўтказди. Унда 20 дақиқадан тоза вақт қоидаси амалда бўлмади ва жамоалар 35 дақиқадан иккита таймда иштирок этди. Бунда расмий ҳакамлар бўлмади, футболчилар майдонда рақамларсиз ҳаракат қилди, дея маълум қилди жамоа матбуот котиби.

Паманага қарши учрашув олдидан тайёргарлик вазифасини ўтаган машғулот ўйинида Италия терма жамоаси 5:0 ҳисобида зафар қучди. Бунга қадар Португалияга қарши ўйин 1:5 ҳисобида, Испанияга қарши учрашув эса 0:4 ҳисобида якунига етганди.

11 сентябрь Тошкент вақти билан тонгги 4:00 да Ўзбекистон мундиалдаги илк учрашувини Панамага қарши ўтказади.