Футзал бўйича Ўзбекистон терма жамоаси 8 сентябрь куни Колумбиянинг Кали шаҳрида расмий машғулот ўтказди.
Жамоанинг машғулотлари “Колизео Эль Пуэбло” номли спорт мажмуасида бўлиб ўтди. Таъкидлаш керакки, ушбу спорт мажмуаси 12 минг томошабинни ўз бағрига сиғдира олади ва футзал бўйича Жаҳон чемпионати бўлиб ўтадиган уч мажмуадан бири ҳисобланади. Очилиш маросими ва финал учрашувлари ҳам ушбу мажмуада ўтказилади.
Машғулот давомида Ўзбекистон терма жамоаси бош мураббийи чемпионат доирасидаги биринчи учрашувдаги рақиб – Панама биллан ўйин учун бир қанча тактик машқлар ўтказди.
Эслатиб ўтамиз, футзал бўйича жаҳон чемпионати 10 сентябрь куни бошланади. Ўзбекистон терма жамоасининг Панамага қарши учрашуви маҳаллий вақт билан 18:00да (Тошкент вақти билан 11 сентябрь 04:00да) бошланади.
Колумбиялик журналистларнинг фикрича, Ўзбекистон – Панама учрашувида маҳаллий мухлислар Ўзбекистонни қўллаб қувватлашади. Сабаби – Ўзбекистон Республикаси байроғи ва Кали шаҳри байроғи бир-бирига жуда ўхшашдир.
