Бугун паралимпия ўйинларининг дзюдо мусобақаларида иштирок этган 5 нафар ўзбекистонлик спортчиларнинг барчаси медалларга сазовор бўлишди.

Олтин медаль
Эркаклар ўртасида энг оғир вазн (+100 кг) тоифасида иштирок этган Одилжон Тулендибаев барча рақибларини иппон баҳоси билан мағлуб этди. Ҳамюртимиз дастлабки саралаш босқичида АҚШлик дзюдочини 1:42 дақиқада, чорак финалда озарбойжонлик спортчини 1:55 дақиқада, ярим финалда япониялик Кенто Масакини 7 сонияда, финалда эса бразилиялик Силва де Араухони атиги 2 сонияда мағлубиятга учратди.

Кумуш медаль
Аёллар ўртасида 70 кг.дан ортиқ вазнда иштирок этаётган Ҳайитжон Алимова кумуш медалга эга чиқди. Ҳамюртимиз финалга қадар таиландлик ва беларуслик спортчиларни мағлуб этиб, ҳал қилувчи баҳсда хитойлик Ян Пинг Юанга имкониятни бой берди.

Бронза медаль
Аёллар ўртасида 70 кг.гача вазнда иштирок этаётган Гулруҳ Раҳимова бронза медалини қўлга киритди. Ҳамюртимиз илк баҳсдаёқ мексикалик рақибга ютқазди. Шундан сўнг бронза медали учун кечган жангларда хитойлик ва венгриялик дзюдочиларни мағлубиятга учратди.

Эркаклар ўртасида 90 кг.гача бўлган вазнда Шуҳрат Бобоев илк жангда АҚШлик дзюдочига ютқазган бўлса, кейинчалик аргентиналик ва кубалик спортчиларни енгиб, бронза медалига сазовор бўлди.

Эркаклар ўртасида 100 кг.гача бўлган вазнда Ширин Шарипов чорак финал босқичида туркиялик рақибни енгиб, ярим финалга чиқди. Аммо финал йўлланмаси жангда у бразилиялик дзюдочига ютқазди. Шарипов бронза медали учун кечган беллашувда озарбойжонлик рақибидан устун келди.

Мазкур медаллардан кейин Ўзбекистон делегацияси ҳисобидаги медаллар сони 17тага етди: 4та олтин, 3та кумуш ва 10та бронза.