Футзал бўйича Ўзбекистон терма жамоасининг жаҳон чемпионатларидаги илк голи муаллифи — Жавлон Аноров Колумбияга қарши бўладиган учрашув олдидан ўз фикрларини билдириб ўтди. Унинг фикрича, терма жамоамиз номдор рақибларга муносиб қаршилик кўрсата олади.

«Колумбия терма жамоаси ҳақида етарли маълумотга эгамиз. Уларнинг Португалияга қарши учрашувини бевосита кузатиб бордик. Бу жамоа менда ёрқин таассурот қолдирди. Бу жамоа сифатида ҳақиқий футзал усталари йиғилган. Айниқса, жамоа сардори Анжеллотта Карони ажратиб кўрсатишим мумкин. У дастлабки баҳсда энг яхши ўйинчилардан бири бўлди», - дейди Аноров.

«Мураббийимизнинг фикрига қўшиламан. Рақиб номдор бўлишига қарамай, биз охиригача курашмоқчимиз. Умид қиламан, жаҳоннинг исталган жамоасига қарши ўйнай олишимизни исботлай оламиз. Биринчи турда мағлубиятга учраганимизга қарамай, биз оптимистик руҳдамиз. Ўз ўйинимизни топиб олсак, кўп нарсаларга эришишимиз мумкин», - деди Жавлон Аноров.