Осиё чемпионлар лигаси-2016 чорак финал жавоб ўйинлари доирасидаги “Локомотив” – “Ал-Айн” ўйинидан кейин ташкил этилган матбуот анжуманида дастлаб, меҳмонлар мураббийи Златко Далич иштирок этиб, ўйин ҳақидаги фикрлари билан ўртоқлашди.

"Жамоамни ғалаба билан табриклайман. Бугун фантастик ўйин ўтказдик. Шу билан бирга, "Локомотив"ни ҳам яхши ўйин ўтказгани билан табриклайман. Аммо, бугун менинг жамоам кучлироқ эди. Ўйин учун танлаган тактикамиз бугун натижа берди. Айрим вазиятларда эса омад ҳам бизга кулиб боқди. Лекин омад ҳам унга муносиб бўлганларга кулиб боқади. Голдан сўнг натижани ушлаб қолиш учун ҳаракат қилдик. Барчаси ўзимизга боғлиқ эди ва биз буни уддалай олдик. 

 Ўзбекистонда ҳеч қачон ютқазмаганим ҳақида ўйиндан олдинги матбуот анжуманида ҳам айтиб ўтгандим. Бу ёқимли анъана давом этаётганлигидан хурсандман. Аввалги босқичда ҳам ўз майдонимизда дуранг ўйнаб, сафарда ғалаба қозонгандик. Бу шогирдларим менинг кўрсатмаларимни мукаммал бажараётганликларидан далолат. Биз "Локомотив"дек идеал формада эмасдик. Насиб қилса, албатта ўз формамизга кириб оламиз. Бу биз учун иккинчи ярим финал ва бу ажойиб натижа”, дейди Далич.