ФИФА бугун терма жамоаларнинг навбатдаги рейтинги жадвалини эълон қилди. Унга кўра, Ўзбекистон терма жамоаси 6 поғона юқорига кўтарилиб, 49-ўринга жойлашди.

Хабарингиз бор, терма жамоамиз август ойидаги рейтингдан кейин 3та учрашувда майдонга тушди. Бабаян шогирдлари ўртоқлик учрашувида Буркина-Фасони, ЖЧ-2018 саралаш босқичи доирасида Сурия ва Қатарни мағлуб этишди. Мазкур ғалабалар натижасида Ўзбекистон ҳисоби 61 баллга бойиди. Оқибатда термамиз ҳисобидаги очколар сони 621 баллни ташкил қилмоқда. Бу эса Ўзбекистон терма жамоасига ФИФА рейтингининг кучли элликталигига кириш имконини беради. Терма жамоамиз 9 йилу 8 ойдан кейин топ-50га киришга муваффақ бўлади. Жамоамиз 2007 йилнинг январь ойида 45-ўринга кўтарилганди.

Термамиз Эрон (37-ўрин, 712 балл), Австралия (45, 643) ва Жанубий Корея (47, 634)дан кейин Осиёнинг тўртинчи жамоасига айланди. Саудия Арабистони (52) ва Япония (56) биздан кейинги ўринларни эгаллади. ЖЧ-2018 саралашида биз билан бир гуруҳдан ўрин эгаллаган жамоалар қуйидаги ўринларни банд этишган: Хитой (78), Қатар (85) ва Сурия (114).

МДҲ ва Болтиқбўйи мамлакатлари орасида Ўзбекистон Украина (29) ва Россия (38)дан кейин учинчи ўринни эгаллаб турибди.

Аргентина терма жамоаси катта фарқ билан ФИФА рейтинг жадвалини бошқаришда давом этмоқда. Бельгия 2-ўринни банд этган бўлса, Германия бир поғона кўтарилиб, кучли учликка кирди. Бразилия терма жамоаси эса бирданига 5та ўрин юқорилаб, 4-ўриинга чиқиб олади. Кучли бешликни Колумбия якунлаб беради.

Рейтинг жадвалининг тўлиқ кўриниши билан ФИФА расмий сайтида танишиб олишингиз мумкин.