“Обод” - “Навбаҳор” жамоалари ўртасидаги учрашув якунлангач ўтказилган матбуот анжуманининг биринчи қисмида “Навбаҳор” бош менеджери Равшан Бозоров ОАВ вакилларининг саволларига жавоб қайтарди:

- Ўйинни умумий оладиган бўлсак, хунук аҳволда баҳсни бой бердик. Натижа ҳам ўйинга яраша бўлди. Нима сабабдан бундай бўлганлигини ҳозир билмайман. Хато ва камчиликларимини ўрганиб чиқиб, ўйинни таҳлил қилиб чиқамиз. Рақибни енгил тарзда ҳаракат қилишига нима сабабдан имкон берилганини тушунмадим. Балки, йигитлар ўзларини тайёрлай олишмагандир ёки қизишиб кетишдимикин, очиғи ҳозир бу ҳақда бирор-бир жўяли фикр билдириш мушкул. Бугун барча ҳимоячиларимиз жуда ёмон ўйин кўрсатишди. Олий лигада тўп сурадиган нафақат ҳимоячи балки ҳар қандай футболчи тўпни осонлик билан ўзига бўйсундириб, жамоадошига аниқ етказиб бера олиши шарт. Дилшод Жабборов чарчаб қолгани йўқ. Ушбу футболчимиз сўнгги ўйинларда жароҳат билан ўйнамоқда. Шу сабабли унга майдонда тўп суриш осон бўлмаяпти. Иккинчи даврани дастлабки турида “Локомотив”га йирик ҳисобда имкониятни бой берган бўлсакда, бугунгидан кўра яхшироқ ўйин кўрсатгандик. Бугун энг ёмон ўйинимизни ўтказдик. Бир сўз билан айтганда айни пайтда саволларга аниқ жавоб қайтаришда ҳам қийналмоқдаман. Тажриба борасида рақибдан кам эмасдик. Жамоавий ўйин ва айрим футболчиларнинг индивидуал ҳаракатлари туфайли ютқаздик деб ўйлайман.