Олий лигада муҳим палла яқинлашганини ҳис этган жамоамиз вакиллари турдан-турга мазмунли ўйин намойиш этишмоқда. Кеча Нўъмон Ҳасанов шогирдлари Қўқонда “Металлург”ни қабул қилиб, 2:1 ҳисобида зафар қучишди. Қўқонлик футбол мухлисларига олам-олам қувонч улашган учрашувга аталган фотомақола билан танишинг.
ФИФА рефериси, Жаҳоннинг энг яхши ҳаками -Равшан Эрматов бошқарган ўйинлар жамоамиз учун омадли келмоқда. Равшан Эрматов ишлаган учинчи баҳсда ҳам уч очкога эга бўлдик. Кечаги ўйинни бошқарган ҳакамлар ва ҳар икки жамоа сардорлари – Носир Отақўзиев ҳамда Ҳикмат Ҳошимовлар учрашувдан олдин эсдалик учун суратга тушишди.
Суҳроб Бердиев кечаги баҳсни юқори даражада ўтказди. Бунинг натижасида учрашувда ҳисобни очиш айнан тиниб-тинчимас ҳужумчимизга насиб этди.
Голни футболчиларимиз шу тарзда нишонлашди. Дарко Гожковичнинг қувончи чексиз.
Бутун учрашув давомида фаол ҳаракат қилган Носир Отақўзиев боши билан рақиб дарвозасини аниқ нишонга олди. Аммо пенальтини голга айлантира олмагани чакки бўлди.
Ҳар бир ўйинда Отабек Зокиров юқори спорт формасига кириб олганини исботламоқда. Кечаги ўйин ҳам бунга далил бўла олади.
Жавоҳир Сиддиқовнинг кечаги ҳаракатлари мақтовга сазовор. Кеча мухлислар уни бежизга Месси, Месси деб олқишлашмади. Сиддиқов “Металлург” футболчиларни моҳирлик билан алдаб ўтиб, мухлислар меҳрини қозонди.
Азиз Ашуровга ҳам тасанно. Унинг маҳорати жамоамизнинг ғалабасини таъминлади. Дарвозабон ярим жамоа деган ақида нақадар тўғри эканлиги кеча ўз исботини топди.
“Марказий” ўйингоҳга ташриф буюрган 5159 томошабин бутун ўйин давомида шундай тарзда футболчиларни олқишлаб туришди. Ғалаба эса уларга аталди.
