Ўсмирлар ўртасида Осиё чемпионатининг 2-тури доирасида бўлиб ўтган Яман ва Ўзбекистон терма жамоалари ўртасидаги баҳсдан кейин Темур Олимхўжаев ўз фикрлари билан ўртоқлашди.

"Бугунги рақибимиз - Яман терма жамоаси яхши ўйин кўрсатди. Бу жамоа билан Фаластинда ўтказилган саралаш босқичида ҳам тўқнаш келгандик. Ўшанда 5:2 ҳисобида ғалаба қозонгандик. Шундан буён улар ўйин жиҳатдан катта ўсишга эришди. Улар буни бугунги ўйинда исботлашди. Бироқ биз барибир кучлироқ эканимизни кўрсатдик ва ғалаба қозондик.

Ҳимоямиз аввалги ўйинга таққослаганда ишончлироқ ҳаракат қилди. Аммо, барибир, улар бугун ҳам кўплаб хатоларга йўл қўйишди ва Яман хавфли вазиятлар яратди.

Дарвозабонимиз яхши сейвлар амалга оширди. Тўғри. Бу унинг иши ва у ўз ишини яхши бажарди.

Танаффусдан сўнг ҳужумда анча фаолроқ ҳаракат қилдик. Биринчи бўлимдан кейин керакли хулосалар чиқариб, ўзгаришлар қилдик.

Бугунги ўйинлар натижаларидан қатъи назар, Шимолий Кореяга қарши ўйинда ҳам ғалаба учун майдонга тушамиз. Гуруҳ ғолиби бўлишга интиламиз", - дейди Темур Олимхўжаев.