«Челси» бош мураббийи Антонио Конте Англия лига кубогининг 3-босқичи доирасида «Лестер»га қарши ўйин борасида ўз фикрларини билдириб ўтди. Ўйин давомида лондонликлар 0:2 ҳисобида ортда бораётиб, қўшимча бўлимларда 4:2 ҳисобида ғалабани расмийлаштиришди.

«Бу ҳақиқий британча ўйин бўлди. Учрашувнинг 30-дақиқасида 0:2 ҳисобида ортда бораётиб, якунда 4та гол уриш ва кейинги босқичга чиқиш — бу ғаройиб.

Агар ўтказиб юборилган голлар борасида фикримни сўрасангиз, жамоамнинг хатоларидан норозиман. Аммо мен футболчиларнинг ақлбовар қилмас характерини кўрдим. Улар ижобий натижага эришиш учун бирдамлик билан ҳаракат қилишди. Футболчилар сидқидилдан ўйнаб, ғалабага бўлган ирода намойиш этишди. АПЛнинг аввалги баҳсидаги мағлубият ва бугун ўтказиб юборилган 2та голдан кейин буни амалга ошириш осон эмасди.

Ўйинимизни кучайтиришимиз кераклигини биламиз. Буни яна такрорлашим мумкин. Бунга эришишнинг ягона йўли — жиддий ишлаб, айрим жиҳатларимизни яхшилашимиз керак. Ишончим комил, биз буни уддалаймиз. Шахсан ўзим бунинг учун бор кучимни сарфлайман», — дейди Конте.