Республика олимпия захиралари теннис мактабида 24 сентябрдан 1 октябрга қадар халқаро Tashkent Open аёллар мусобақаси бўлиб ўтади. Теннис федерацияси матбуот хизматининг хабар қилишича, 20 мамлакатдан 40 нафардан зиёд теннисчи аёл мусобақада қатнашиш тўғрисида ариза тақдим этди. Уларнинг 17 нафари профессионаллар бўлиб, WTA рейтингининг биринчи кучли юзталигидан ўрин олган.
Тошкент очиқ чемпионати ғолибалигига асосий номзодлардан бири швециялик Юханна Ларссон бўлиб, у жаҳон рейтингида 45-поғонани банд этиб турибди. Шунингдек, Кирстен Флипкенс (Бельгия, 58-ўрин), Чагла Бююкакчай (Туркия, 64) ҳамда ўтган йилги финал иштирокчиси Нао Хибино (Япония, 76) имкониятларига ҳам юқори баҳо берилмоқда.
Фаворитларга Шувэй Се (Хитой Тайпейи, 82), Наоми Броуди (Буюк Британия, 87), Леся Цуренко (Украина, 80), Куруми Нара (Япония, 78), Дениса Аллертова (Чехия, 89) ва Анна-Каролина Шмидлова (Словакия, 99) қаршилик қилади.
Мусобақаларда Ўзбекистон термаси номидан икки теннисчи — Нигина Абдураима (176) ва Сабина Шарипа (163) иштирок этади.
Анъанага кўра, Tashkent Open вақтида болалар учун таниқли теннис усталари раҳбарлиги остида мастер-класслар (29 ва 30 сентябрь), журналистларнинг ҳаваскорлик учрашувлари (28 сентябрь), Ўзбекистонда аккредитациядан ўтган дипломатик миссиялар, хорижий ваколатхоналар, чет эл компаниялари, фирмалар ва қўшма корхоналар вакиллари учун мусобақа (1 октябрь) бўлиб ўтади.
Турнирнинг умумий соврин жамғармаси 250 минг долларни ташкил этиб, уларнинг 226,75 минги ўйинчиларга тақдим этилади, қолган қисм эса тадбир ташкилотчилари харажатлари учун сарфланади.
