Канада ва АҚШ Миллий олимпия қўмита (МОҚ)лари Миллий Хоккей Лигаси (NHL) ўйинчиларининг Пхёнчхан—2018 қишки Олимпиадасида иштирок этиши учун пул тўлашга тайёр. Бу ҳақда Россия хоккей федерацияси президенти, Халқаро хоккей федерациялари кенгаши (IIHF) аъзоси Владислав Третяк маълум қилди, деб хабар бермоқда «ТАСС».
Аввалроқ IIHF раҳбари Рене Фазел ташкилот Халқаро олимпия қўмитасига Олимпиада мусобақаларида NHL хоккейчиларининг суғуртаси ва сафар харажатларини қоплаб беришда ёрдам кўрсатишни сўраб илтимос билан мурожаат қилиши ҳақида маълум қилганди.
Владислав Третякнинг қайд этишича, NHL раҳбарияти лига хоккейчиларининг 2018- ва 2022 йилги қишки Олимпия ўйинларидаги иштироки IIHF ва ХОҚ ўртасидаги муносабатларга боғлиқ эканига эътибор қаратган.
Миллий Хоккей Лигаси ўйинчиларининг Олимпиада ўйинларидаги суғуртаси учун IIHF ва ХОҚга 10 миллион доллар керак бўлади. Шу муносабат билан, NHL вакиллари 2018 йилги қишки Олимпиадани ўтказиб юбориш эҳтимоли бор.
Ташкилотлар мазкур муаммо ечимини топиш мақсадида ХОҚ ва миллий федерациялар билан ҳамкорликда музокаралар олиб бормоқда. Ушбу масала юзасидан қарор 2017 йилнинг январь ойи ўрталарида қабул қилиниши керак.
Маълумот учун, NHL хоккейчилари 1998 йилдан буён қишки Олимпиадаларда иштирок этиб келмоқда.
