"Пахтакор" ва "Локомотив" жамоалари ўртасидаги ўйиндан кейин матбуот анжумани ташкил этилди. Унда дастлаб темирйўлчилар бош мураббийи Андрей Микляев иштирок этди.

"Пахтакор"ни қўлга киритилган муносиб ғалаба билан табриклайман. Бугун ўйинимиз яхши чиқмади. Кетма-кет иккинчи учрашувда йигитлар кўрсатмаларни бажара олишмаяпти. Биринчи бўлимда мезбонлар жуда яхши ўйнашди.

Мезбонларнинг қарши ҳужумларидан қўрққандик. Машарипов ажойиб ўйин намойиш қилди. Йигитларда "Пахтакор"дан қўрқиш синдроми бордек. Бугун ўз футболчиларимизни танимадим. Улар биринчи марта майдонга тушгандек ҳаракат қилишди. Амалда ҳеч нарса кўрсатишни уддаламадик. Барча жиҳатларда мағлубиятга учрадик. Курашлар, тўпни эгаллаш, тезликда ютқаздик. Майдон марказида ўйинни тўлиқ бой бердик", - дея Микляевнинг сўзларидан иқтибос келтирди "Пахтакор" клубининг Твиттердаги саҳифаси.