Кеча хабар бериб ўтганимиздек Тошкент шахрида Киберфутбол бўйича Жаҳон чемпионати саралаш босқичи бўлиб ўтди. “Virtual Football” компаниясининг ташаббуси билан Республикамизнинг барча вилоят ва шахарларидан 70га яқин киберфутболчи шу йилнинг октябрь ойи охирида бўлиб ўтадиган Жаҳон чемпионатига ажратилган битта йўлланма учун кураш олиб бордилар.

Соат 10:00дан бошланган саралаш мусобақаси эрта тонгга қадар драматик тарзда давом этди. Жамоамиздан 4 нафар киберфутболчи ҳам ушбу йўлланма учун кураш олиб бордилар. Икки киберфутболчимиз ўзаро қуйи лига чорак финалида ўзаро курашган бўлсалар яна икки нафар киберфутболчиларимиз қуйи лига ярим финалида учрашдилар.

Муросасиз кечган бахсларда финалга икки карра Ўзбекистон чемпиони ва икки марта Жаҳон чемпионати иштирокчиси “Локомотив” сардори, профессионал киберфутболчи Абдусапи Қаюмов ва “Бунёдкор” клуби вакили Муҳаммадамин Турғунбоевлар финалга қадар етиб бордилар.

Финал эса амалда Абдусапи Қаюмов ташаббуси билан ўтказилмади ва фейр-плей тарзида якун топди.

Икки марта Жаҳон чемпионатида қатнашган Абдусапи Қаюмов ёш киберфутболчи Муҳаммадамин Турғунбоевга Франциянинг Париж шахрида бўлиб ўтадиган Жаҳон чемпионатида омад тилади ва келажагимиз бўлган ёшларни ушбу чемпионатда қатнашиб юртимиз шарафини муносиб ҳимоя қилишига тилакдош эканлигини билдирди.

Шу тариқа Жаҳон чемпионати саралаш босқичи ажойиб кайфиятда, фейр-плей тарзида якунланди.

Жаҳон чемпионати саралаш бахсларида кучли саккизликка кирган киберфутболчилар PCFL (Professional Cyber Football League)га тўғридан тўғри йўлланма олдилар.

“Локомотив” киберфутболчилари Абдусапи Қаюмов, Ўктам Иброҳимов ва Шерзод Миразизов Олий лигада қатнашиш имконияти қўлга киритдилар.

Яна бир киберфутболчимиз Санжар Азизов 1 октябрь куни бўлиб ўтадиган Олий Лига саралаш бахсларида қатнашади.