Вьетнамнинг Да Нанг шаҳрида давом этаётган соҳил спорт турлари бўйича Осиё 5-ўйинларида бугундан самбо бўйича беллашувлар бошлангани хақида хабар бергандик. Бугун икки нафар ҳамюртларимиз баҳсларга киришиб улардан бири олтин, иккинчиси бронза медали учун курашиш имкониятини сақлаб қолишганди.
Ҳозиргина Ўзбекистон терма жамоаси аъзолари иштирокидаги беллашувлар якунланди. Қувонарлиси вазни 93 килограмгача бўлган полвонлар баҳсида Илҳомжон Йўлдошев финал жангини қозоғистонлик Алибек Зекеновга қарши ўтказиб қийин кечган беллашувни ўз фойдасига ҳал қилди ва соҳил спорт турлари бўйича Осиё ўйинларининг олтин медалига сазовор бўлди.
Демак делегациямиз ҳисобидаги олтинлар сони учтага етди. Бунгача кураш бўйича вазни 73 килограмгача бўлган спортчилар баҳсида Суҳроб Худойбердиев ҳамда вазни 66 килограмгача бўлган полвонлар ўртасида Миржон Тўхтаевлар шохсупанинг энг юқорисидан жой олишганди.
Аёллар ўртасида вазни 56 килограмгача бўлган спортчилар ўртасида Маликабону Мирзаева терма жамоамиз ғазнасига биринчи бронза медалини келтирди. Ҳал қилувчи жангни у таиландлик Чайсанг Сасипилайга қарши ўтказиб рақибини таслим этишни уддалади ва бронза медалига сазовор бўлди.
Демак ҳозирча делегациямиз ҳисобида 3 та олтин, 1 та кумуш ва 1 та бронза медаллари мавжуд ва терма жамоамиз жами 5 та медаль билан умумжамоа ҳисобида 41 мамлакат вакиллари орасида 9-ўринда бормоқда. Ҳамюртларимиз Марказий Осиё давлатлари орасида биринчи ўринга кўтарилиб олишди.
Эртага самбо бўйича яна икки нафар вакилларимиз баҳсларни бошлашади. Аёллар ўртасида 64 килограмгача вазн тоифасида Ирина Кулакова илк жангини непаллик Асмила Чантялга қарши ўтказса, эркаклар баҳсида юртдошимиз Истам Қудратов 74 килограмгача вазн тоифасида Мўғилистон вакили Батмунх Энхбатга қарши кураш олиб боради.