Футбол бўйича Англия терма жамоаси футболчилари коррупцияга алоқадор деб топилган ҳамда терма бош мураббийи лавозимидан озод этилган Сэм Эллардайсдан, у истеъфосига чиққанидан икки кун ўтиб, «Биргаликдаги саёҳатимиз бошланди!» сўзлари битилган табрик мактубларини олди. Бу ҳақда, Mirror газетасига таяниб, «ТАСС» хабар бермоқда.

Эллардайс футболчиларга мактубларни 27 сентябрь куни, у бош мураббийликдан озод этилган куни юборган. Бироқ унинг табрикномалари футболчиларга икки кундан сўнг етиб борган.

«Яхши ишладингиз! Бизнинг саёҳат ғалаба билан бошланди. Сабрсизлик билан учрашувимизни кутяпман. Сэм Эллардайс», — дейилади мактубда.

Сэм Эллардайс Англия терма жамоаси бош мураббийи сифатида 67 кун ишлади. Унинг қўли остида жамоа битта ўйин ўтказди.

4 сентябрь куни Словакия термасига қарши ЖЧ—2018 саралаш учрашувида инглизлар 1:0 ҳисобида ғалаба қозонган эди.

Эллардайснинг истеъфосидан сўнг Англия терма жамоасини Гарет Саутгейт вақтинча бошқариб турадиган бўлди.