Жамоамиз айни пайтда жорий чемпионатда 15та ўйин ўтказиб, барчасида ғалаба қозонган ва турнир жадвалида пешқадамлик қилмоқда.

“Севинч” октябр ойида Ўзбекистон АФА тақвимига кўра, чемпионат доирасидаги учта ўйин ўтказиши белгиланган бўлиб, булар “Севинч” – “Қизилқум Гули”, “Севинч” – “Металлург W” ва  “Севинч” – “Олмалиқ W” учрашувларидир.

Аммо жамоамизнинг 9 нафар ўйинчиси Ўзбекистон аёллар терма жамоаси сафига, 3 нафар футболчимиз U-19 терма жамоасига жалб этилиши муносабати билан, ушбу учрашувлар бошқа кунларга кўчирилади.

Ўзбекистон  аёллар терма жамоаси шу йили 20-24 октябр кунлари Хитойда бўлиб ўтадиган Осиё аёллар терма жамоалари ўртасидаги халқаро турнирда иштирок этишади.

Баҳром Норсафаров бошчилигидаги U-19 терма жамоамиз эса,  28 октябр – 6 ноябр кунлари Душанбеда бўладиган U-19 терма жамоаларининг Осиё чемпионати саралаш босқичига тайёргарлик олиб боришмоқда.

Шунингдек U-19 терма жамоамиз 14-18 октябр кунлари футбол бўйича Марказий Осиё Футбол Ассоциацияси – CAFA  томонидан Тошкентда ўтказиладиган аёллар терма жамоалари ўртасидаги  халқаро турнирида ҳам иштирок этишни режасига киритган.

Айни пайтда мамлакатимиз аёллар терма жамоасини бошқараётган Шерали Бобоқулов 3-9 октябр кунлари Бекободда дастлабки ўқув йиғин машғулотларини ўтказишни режалаштирган. Эслатиб ўтамиз, Шерали Бобоқулов бекободнинг “Металлург W” жамоасининг бош мураббийи ҳамдир.

Қуйидаги футболчиларимиз ушбу йиғинда иштирок этишади:

Дарвозабон

Лайло Тилавова

Ҳимоячи

Маҳлиё Юсупова

Ярим ҳимоячилар

Зумрат Назарова

Саида Хандамова

Феруза Турдибоева

Камола Рискиева

Ильвина Аблякимова

Ҳужумчилар

Нилуфар Қудратова

Маҳлиё Сарикова

Бундан ташқари “Севинч” жамоасининг ўйинчиларидан Мафтуна Шойимова, Малика Бурханова ва Шоҳида Тожиддиновалар ҳам мамлакатимизнинг U-19 терма жамоасининг аъзолари ҳисобланишади.

Демак, “Севинч” жамоамизнинг 12 нафар футболчилари мамлакатимизнинг икки  терма жамоаси сафида юртимиз шаънини ҳимоя қилишади.