Ўзбекистон терма жамоаси бугун ЖЧ-2018 саралаш босқичи доирасида навбатдаги учрашувни ўтказади. Самвел Бабаян шогирдлари "Бунёдкор" стадионида Хитой термасига қарши баҳс олиб боришади.

Мазкур ўйин терма жамоамиз учун аҳамиятли эканини ортиқча таъкидлаб ўтириш шарт эмас. Бугун бизга фақат ғалаба керак. Агар очко йўқотадиган бўлсак, гуруҳ етакчилари — Жанубий Корея ва Эрон биздан узоқлашиб кетиши мумкин. Боз устига, ўз уйимиздаги ўйиндаги баҳсларда максимал очко жамғаришга ҳаракат қилишимиз лозим.

Бугун баҳс кўп нарсага ойдинлик киритиб беради. Ўзбекистон терма жамоаси Эронга қарши ўйиндаги мағлубиятдан кейин хулоса чиқариб, бугун бошқача ўйин намойиш қиладими ёки Бабаян жамоасининг бори шуми?! Жаҳон чемпионатига чиқишни истаган жамоа оғир вазиятдан чиқиб кетишни билиши керак. Шундай эмасми?

Бугунги ўйин учун чипталар ҳамон сотилаётган эмиш — кассада ва қўлда ўз нархида. Мабодо, ҳали "чипта топилармикан", деб ўйланаётган бўлсангиз, хотирангизни жам қилиб, руҳингизни юқори қилган ҳолда "Бунёдкор" стадиони томон йўл олишингиз мумкин. Ўйин вақти ўзгармаган — 18:00. Терма жамоа футболчилари бугун мухлисларнинг қўллаб-қувватлашига муҳтож.

Ҳали ҳеч нарса йўқотилмаган. Терма жамоамиз ЖЧ йўлланмаси учун кураш йўлида асосий даъвогар мақомини сақлаб қолиш учун бугун Хитойни мағлуб этиши шарт. Ўзбекистонга омад!