Португалиялик футболчи Криштиану Роналду, сербиялик теннисчи Новак Жокович, чехиялик футбол дарвозабони Петр Чех ва Англиянинг «Лестер» футбол клуби Гиннесс рекордлар китобининг 2017 йилги нашрига киритилди. Бу ҳақда «ТАСС» хабар бермоқда.

Guinness World Records сайтида маълум қилинишича, Роналду Twitter ижтимоий тармоғининг энг машҳур спортчисига айланди — 2016 йил 7 октябрь ҳолатига кўра унинг микроблогида 47 миллион 262 минг 909 обуначи бор. Жокович бир теннис мавсумида қўлга киритилган мукофот пуллари ҳажмига кўра рекорд ўрнатди — 2015 йили бу кўрсаткич 21460145 долларга тенг бўлди.

Петр Чех Англия Премьер-лигасида бошқа барча дарвозабонлардан кўпроқ — 181 — учрашувда ўз дарвозаси дахлсизлигини сақлаб қолди. «Лестер» жамоаси эса 2014/2015 йилги мавсумда 13-ўринни эгаллаб, кейинги мавсумнинг чемпионига айланди. Бу Премьер-лигада икки мавсум ичида кузатилган рекорд даражадаги кўтарилиш бўлди.

Шунингдек, рекордчилар рўйхатига англиялик футболчи Гарет Барри кирди — Премьер-лигадаги 580 учрашувда асосий таркибда майдонга тушди. Америкалик теннисчи Серена Уильямс эса Катта дубулға туркуми турнирларида қўлга киритилган биринчи ва охирги титул орасидаги энг узун муддатни қайд қилди (1999 ва 2016 йиллар).