«Интер» ҳужумчиси Мауро Икарди фанатларнинг қаҳрига учраб қолди. Мухлислар уни сардорлик боғичидан маҳрум қилиш талабини қўйишди.

Гап шундаки, Икарди яқинда савдога чиққан автобиографик китобида, бир воқеани баён қилган.

«2015 йил февраль ойида «Интер» клуби «Сассуоло»га (1:3) имкониятни бой берди. Ўйиндан сўнг трибуна олдига бориб, мени футболкамни сўраб хат ёзган мухлис болакайга уни ечиб бердим. Бироқ шу заҳоти уни олдига бошқа фанат келиб, футболкани тортиб олди ва қайтариб менга отди. Мен унга: «Ифлос экансан, болани хафа қилиб, менга ўз муносабатингни билдирмоқчимисан?» - дедим» - деб ёзган Икарди ўз китобида.

Бу воқеа «Интер» фанатларини ғазабини қўзғади. «Бу сени ҳаёлингда юз берган воқеа. Китобинг бошдан охиригача ёлғондан иборат Сен барча айбни мухлисларга тўнкамоқчисан. Сардорлик боғичига лойиқ эмассан. Бундан буён биз учун мавжуд эмассан» - деб баёнот берди Curva Nord фанатлар гуруҳи.