Куни кеча Жанубий Корея футбол Ассоциацияси техник тайёргарлик бўлими фавқулодда йиғилиш ўтказди. Корейс матбуоти хабарига кўра, ушбу шошилинч йиғилишда Жанубий Корея ўсмирлар терма жамоасининг Осиё чемпионатидги муваффақиятсизлиги ва Ўзбекистонга қарши ўтадиган ЖЧ саралаш ўйинига тайёргарлик каби масалалар муҳокама қилинган.

Кескин тарзда ўтган ушбу йиғилишда Корея футбол ассоциацияси техник бўлими ва мураббийлар штаби олдига қатъий вазифалар қўйилган. Корея футбол ассоциацияси матбуот хизмати берган маълумотда айтилишича, агар 15 ноябрь куни Ўзбекистон терма жамоаси мағлуб этилмаса, футбол ассоциацияси техник бўлими ва мураббийлар штаби “таг томири” билан тозаланади, лавозимда ўтирган барча мансабдорлар истеъфога чиқарилади.

“Sports Seoul” нашри шундай ёзмоқда: “Марказий Осиёнинг энг кучли жамоаси бўлмиш Ўзбекистон терма жамоаси ҳақида ипидан игнасигача маълумот тўплаш ва мураббийлар штабига кўмаклашиш учун техник бўлими олдига катта масъулият қўйилади. 15 ноябрь куни корейс футболи йўлида қизил чироқ ёнмаслиги учун барча бир тану бир жон бўлиши керак”.

Корея футбол ассоциацияси Ўзбекистон билан ўйин натижасини “Ўйин + Дуранг = Мағлубият”, деган ўзига хос формула шаклида эълон қилди. Яъни, дуранг ҳам корейслар учун мағлубиятга тенг. Агар 15 ноябрь куни Ўзбекистон терма жамоасини енга олмаса, Корея футбол ассоциацияси бош мураббий Ули Штиликени истеъфога чиқаради ва кейинги ўйин 2017 йил март ойида бўлишини инобатга олсак, янги мураббий 4 ой давомида жамоани ўрганишга улгуриши назарда тутилмоқда.

Корейс нашрлари маълумотлари асосида Отабек Йўлдошев тайёрлади.