Жанубий Корея футбол ассоциацияси президенти Чунг Монг-Гю махсус матбуот анжумани ташкил этиб, барчани терма жамоани қўллаб-қувватлашга чақирди.

Кореяликлар ҳозирда ЖЧ-2018 саралаш босқичида 7 очко билан 3-ўринни эгаллаб туришибди. Терма жамоа 15 ноябрь куни Сеул шаҳрида Ўзбекистонни қабул қилади.

"Жаҳон чемпионати саралаш босқичи ҳеч қачон осон кечмаган. Ушбу босқичдаги 10та ўйиндан энди тўрттасида иштирок этдик. Ҳафсалани пир қилишга ҳали эрта. Ўзбекистон қарши ўйин жуда катта аҳамиятга эга. Шу боис, мен ишқибозлар ва ОАВ вакилларидан терма жамоа, мураббийлар ва футболчиларни қўллаб-қувватлашларини сўрайман. Бу ўйинда ижобий натижа қайд этишга ҳаракат қиламиз", - деди Чунг Монг-Гю.

Жанубий Корея терма жамоаси бош мураббийи Ули Штилике матбуот анжуманида "Терма жамоада Қатар ҳужумчиси Себастьян Сория каби футболчи йўқ", - деб айтган фикри жанубий кореялик футболчиларга ёқмади. Чунг Монг-Гю ушбу фикрга қуйидагича муносабат билдирди.

"Ғарб маданияти учун бу норма ҳолат. Европада мураббий учрашувдан кейинги матбуот анжуманида ўйиннинг ҳар бир жиҳатини таҳлил қилиб беради. Кореяда эса мағлубиятдан кейин мураббий барчадан узр сўрашига ва масъулиятни ўз зиммасига олишига ўрганиб қолган. Биз мураббийдан шуни кутгандик, аммо Ғарб мамлакатларида мураббий эксперт сифатида қабул қилинади. Штилике энди маданиятлар ўртасидаги фарқни тушуниб олди. У мухлислар ва ОАВ томонидан билдирилаётган танқидларни тинглайди. Ишончим комил, кейинги баҳсда ўйинимизни кучайтирамиз. Ўйлайманки, ҳозирги кунда терма жамоага мағзава ағдаргандан кўра, уни қўллаб-қувватлаш фойда беради" - дейди Федерация раҳбари.