Маълумки, "Локомотив" клуби эртага Олий лиганинг 26-тур учрашувини ўтказади. "Темирйўлчилар" сафарда "Бухоро" меҳмони бўлишади. Бугун эрталаб Бухоро шаҳрига етиб келган футболчиларимиз кечки пайт ўйин бўладиган стадионда машғулот ўтказишди.
"Локомотив" машғулотини кўриш мақсадида кўплаб мухлислар, шунингдек, болакайлар стадионга келишди. Машғулот якунига етгач, футболчиларимиз мухлислар қуршовида қолиб кетдилар.
Ҳамма бирин-кетин дастхат беришга, ишқибозлар билан эсдалик суратга тушишга киришиб кетди. Бир сўз билан айтганда, 15-20 дақиқача мухлислар "Локомотив" футболчиларини "тинч қўйишмади". Бундан эса табиийки мухлислар хурсанд бўлишди.
